Nagaabot sa haeos 165,000 nga mangunguma sa Western Visayas, kaibahan ro Negros Occidental, ro sakop it government-backed crop insurance para sa unang cropping season it 2026.
Suno sa Philippine Crop Insurance Corporation Region 6, kapin sa 149,389 rice farmers nga may masobra sa 120,000 ektarya it kaeanasan ro may insurance coverage nga ginatantyang P3 bilyon, samtang 15,577 corn farmers mat-a nga may masobra 17,000 ektarya ro sakop it P436.9 milyon nga insurance.
Sa kabilugan, masobra sa 137,000 ektarya it kaeanasan ag kamaisan ro protektado kontra sa kalamidad, peste ag sakit.
Para sa rice insurance, nagtaeana ro national government it P300.147 milyon nga premium subsidy, samtang P43.691 milyon mat-a ro premium subsidy para sa corn insurance.
Libre ro insurance premium para sa mga kwalipikadong mangunguma bangud nga sabat raya it gobyerno.
Gin-engganyo it PCIC ro mga mangunguma nga magparehistro ukon mag-update it andang datos sa Registry System for Basic Sectors in Agriculture ukon RSBSA agud makapanipueos sa programa.
