KALIBO, Aklan—Ginsunog ro nakumpiska nga kapin sa 20 nga kahon it processed pork meat nga nabaeabagan sa quarantine checkpoint it Task Force Anti-Swine Fever sa Caticlan Jetty Port sa banwa it Malay.
Suno kay Dr. Joseph Lachica it Office of the Provincial Veterinarian (OPVET)-Aklan, sakay it sangka wing van truck halin sa Manila ro kinahon nga processed meat products nga pork belly, pork sausage, barbeque ag iba pang karneng baboy nga pagadaehon kunta sa siyudad it roxas sa probinsiya it Capiz.
Naga abot sigon sa masobra sa 500 kilos ro timbang it nasambit nga mga produkto nga nagabalor tanan it kapin sa P300,000 pesos.
Ginasugid nga puro mga Chinese products ro nakumpiska.
Owa it nagakaigo nga mga papel ukon dokumento kapareho it meat safety inspection certificate ro mga produkto rason nga insigidang ginkumpiska ag ginsunog.
Gindugang pa ni Dr. Lachica nga hugut ro pag-monitor makaron it mga awtoridad sa Aklan sa mga produktong baboy bangud sa mga nailistang kaso it African Swine Fever sa Luzon ag Mindanao.
Naga-instrikto man sa pagpasueod it baboy sa Aklan matapos ginmandu ni Gov. Florencio Miraflores ro total ban sa mga buhi nga baboy ag karne halin sa lugar nga may kaso it ASF.
Ginpahayag pa nga ro Western ag Central Visayas ukon ro region 6 ag 7 eon lang ro nagapabilin nga ASF free sa bilog nga nasyon.
Ginlaygayan man kara ro publiko indi anay magbakae it mga processed meat products online bangud nga malisod kon masudlan it mga kontaminadong karne it baboy ro probinsiya.
Eubus sigon nga maapektuhan kara ro mga naga alaga it baboy nga magaresuilta sa pagtaas it presyo it karne it baboy ag kakueangan it supply.
Ginpahayag pa ni Dr Lachica nga umpisa pa ko nagtaliwan nga dag-on hay nag-abot eon sa masobra sa an-um nga toneladang illegal pork products ro nakumpiska it OPVET samtang ro iba hay ginpabalik sa andang point of origin.
