Eumagpas pa sa full-year revenues ko 2021 ro nakolektang buwis makarong dag-on sa unang waeong buean maghalin sa Philippine Offshore Gaming Operators (POGOs) suno sa Bureau of Internal Revenue (BIR).
Sa pagdinig sa Senado, ginpahayag ni BIR Director Atty. Sixto Dy Jr., nga nakakolekta ro ahensiya it P4.438 billion mahhalin Enero hasta Agosto it presenteng dag-on.
Mas mataas raya kumpara sa P3.91 billion nga nakolekta para sa full year 2021.
Ko nakataliwan nga dag-on, kinapos ro koleksiyon maghalin sa target nga P32.1 billion sa idaeom it Republic Act 11590 ukon ro POGO Law nga ginpiyermahan ko September 2021 ni dating Pangueong Rodrigo Duterte.
Sa sueat sa Senado, ginpahayag it BIR nga ro projections sa tax collection para sa dag-ong 2021 hay sandig sa pagtantya nga ro operasyon it POGO hay magabalik sa pre-COVID-19 levels.
Apang owa nagbalik ro POGO entities sa Pilipinas ag pilang foreign nationals nga empleyado it POGo hay nagaba ag owa naabot ro pre-pandemic levels.
Ginpahayag dugang pa it BIR nga ro pilang rason it kapaseawan it pilang POGo industry nga makabalik sa pre-pandemic levels hay bangud sa naghalin ro mga raya sa ibang nasyon kapareho it Dubai sa United Arab Emirates ag sa Vietnam, pagbag-o sa taxing regime ag nagapadayon nga crackdown it Chinese government kontra sa online gambling.
