KALIBO, Aklan—Nagpaguwa eon it P50,000 nga padya ro lokal nga gobyerno it Libacao para sa sin-u man nga makatau it impormasyon sa pumatay sa kolektor it sangka micro-lending company ko Hulyo 26, 2019 sa Sitio Balisong, Barangay Pampango, Libacao, Aklan.
Suno kay Libacao Mayor Charito Navarosa, natumod eon ro daywa sa ap-at nga mga suspek nga puro ginaturo nga eakot sa pagpatay kay John Rey Madera, 24 anyos, residente it Barangay Anabo, Lemery, Iloilo ag kolektor it ASA Philippine Foundation Micro Finance.
Gin-eambangan raya ag ginbaril gamit ro sangka home-made shotgun samtang nakasakay it anang motorsiklo sa nasambit nga lugar nga naging rason it anang hinali nga kamatayon.
Ginasugid nga naduea ro napsack it biktima nga may sueod nga indi pa matumod nga kantidad ag sangka cellphone.
Angot kara, gin-engganyo ni Mayor Navarosa ro mga pumueuyu nga makipagbueuligan sa mga otoridad agud nga madakpan ro mga nakakahilway pang suspek nga gina-alegar nga puro man tumandok it lugar.
Kamana man ro mga suspek nga boluntaryo eon nga magsurender.
Sa pihak nga parte, ginapahaum eon it pulisya ro pagpasaka it nagakaigo nga kaso kontra sa mga pumatay kay Madera.
