Ginpahayag ni Prof. Danilo Arao it University of the Philippines College of Mass Media and Communication nga bukon sa gihapon it bastante ro gin-aprubahan nga P85 nga wage increase para sa mga minimum wage earners sa Metro Manila.
Suno kana, bisan magsaka ro minimum wage halin sa P695 paadto sa P780 kada adlaw, maeayo gihapon raya sa ginakabig nga “living wage” nga naga-abot sa tunga it P1,200 hasta P1,600 kada adlaw para sa isaea ka pamilya nga may an-om nga miyembro.
Ginpunto man ni Arao nga indi gihapon mabaton ro bilog nga P85 nga wage increase bangud ipatuman raya pinaagi sa daywang parte, kun sa siin P60 anay ro iga-tao ag ro nabilin nga P25 hay sa Enero 2027 pa.
Ginsuportahan man nana ro panawagan nga parehason ro minimum wage sa bilog nga nasyon imbes nga may magkaiba nga rates kada rehiyon.
Ginpamilit man nana pareho man ro ubra nga ginahimo it mga trabahador sa probinsya ag sa Metro Manila, kaya indi dapat mag-angkon it deperensya sa bahoe it suweldo.
Dugang pa ni Arao, ro kakueangan it oportunidad sa mga probinsya ag manaba nga suweldo ro kabangdanan kun haman abo nga Pilipino ro naga-adto sa Metro Manila ukon sa ibang nasyon agud mag-angkon it mas mataas nga kita.
Ginhambae man nana nga importante ro pag-tao it living wage agud masiguro nga insakto ro kinahangeanon it pamilya ag malikawan ro negatibong epekto it kapigaduhon sa komunidad. (Bombo Cherry Mae Illavera)
