KALIBO,Aklan — Temporaryong ginpundo ro pa-liga it basketball sa Brgy. Tinigaw, Kalibo.
Raya hay bilang pagta-o it respeto ag pagsimpatiya sa pagkamatay it sangka basketball player kon sa siin ginasugid nga inatake raya sa tagipusuon sa kasagsagan it andang hampang.
Ginkilaea ni Punong Brgy. Lourdes Reyes ro player nga si Eutiquio Igos Jr., 41-anyos ag residente it nasambit nga lugar.
Suno kana, halin sa trabaho si Igos bilang assistant pump operator it Metro Kalibo Water District kon sa siin fourth quarter eon sigon imaw nagsueod sa hampang.
Nataeopangdan sigon ro anang pagpanghina ag nagpaalalay rason nga insigida imaw nga gin-adtunan it tanod nga may kasayuran sa pag-eapat it paunang medikasyon.
Nadaea pa sa ospital si Igos apang gindeklara man nga binawian it hueam nga kinabuhi.
Sa makaron, plano it barangay council nga pa-blessingan it uman ro andang covered court bago padayunon ro hampang.
Ro pa-liga sa barangay hay para sa paaeabuton nanda nga fiesta sa buean it Agosto.
