KALIBO, Aklan — Nagbutang ro barangay council it Bakhaw Norte, Kalibo it mga paandam ukon warning signs kabulig ro Provincial Environment and Natural Resources Office (PENRO)-Aklan sa parte it suba kun sa siin gina alegar nga nakita ro sangka buaya ko nagtaliwan nga buean it Pebrero it makaron nga dag-on it sangka residente.
Suno kay Punong Barangay Reysy dela Cruz it Bakhaw Norte, Kalibo nga ro nasambit nga tikang hay bilang pagtau it abiso sa publiko nga magdahan kasunod it ginasugid nga sighting it buaya.
Ginapalikaw anay ro mga residente nga magpatigayon it anuman nga aktibidad sa lugar partikular ro pagpaligos ag pagpamunit sa suba.
Owa sigon nanda ginaduea ro posiblidad nga may kamatuoran ro pahayag it 63 anyos nga si Mrs. Bhebhe Sabay-Sabay.
Sa pihak nga parte, ginpahayag dugang ni punong barangay dela Cruz nga naging negatibo ro ginpatigayon nanda nga monitoring it PENRO-Aklan.
Suno kana nga ko Marso 20 hasta 24 hay nagpatigayon it maid-id nga pagbantay ro PENRO sa lugar, apang owa sanda it nakita nga buaya.
Nag-umpisa sigon ro andang pagbantay it alas-8 it agahon hasta alas-11 it agahon ag alas-7 it gabi-i hasta alas-9 it gabi-i gamit ro sangka motorbanca nga nag-umpisa halin sa Sitio Ilaya hasta sa baybay.
Sa pihak kara, uman sanda nga magapatigayon it operasyon sa masunod nga domingo ag igatiempo nanda nga high tide.
Uman nga ginklaru ni Kapitan dela Cruz nga ro sighting it buaya hay kato pang Pebrero 11, bandang alas-11 it agahon samtang nagabo-oe sigon it ueang sa suba ro magueang.
Gina alegar nga owa eagi nag report sa barangay si Mrs. Sabay-Sabay bangud sa pagkabaeaka nga indi imaw pagpatihan it mga tawo.
