Ginpundo anay ro aplikasyon para sa pabaeay it gobyerno.
Suno sa National Housing Authority (NHA), raya hay agud nga mataw-an it daean ro pag-ayos it andang sistema kabulig ro mga local government units (LGUs).
Nakikipag-angot eon sigon ro andang ahensya sa mga LGUs agud nga matumod ro mga kuwalipikadong benepisaryo para sa masarangan sa boesa nga pabaeay.
Pagasaligan sigon nga sa masunod nga mga inadlaw hay magapaguwa ro NHA it mas ginpadali nga proseso it aplikasyon.
Ginklaru it ahensya nga owa it sin-o man ro ginmanduan nga makipag-istorya agud nga magproseso it aplikasyon para sa libreng pabaeay ag magpangayo it anumang kabaylo.
Base sa mandato, tuyo it ahensya nga mag-obra it dekalidad ag masarangan sa boesa nga pabaeay para sa mga Informal Settler Families, mga naga-istar maeapit sa mga gina-iligan it tubi, aeagyan it ag mga naapektuhan ukon tinamaan it mga proyekto it gobyerno.
Sakop man kara ro mga pamilyang apektado it desisyon it Korte Suprema angot sa paglimpyo it mga waterways ag nadaeasa it mga kalamidad.
Pabaeay ro sambilog sa magastos apang mapuslanon nga proyekto it gobyerno.
Maabung pamilya ro nataw-an it katumanan ro handum nga makaangkon it kaugalingon ag disenteng panimaeay.
Ro problema, owa nagakaduea ro mga abusado.
May mga pilit nga nagapapel agud nga maka-ginansiya sa proyekto samtang may mga mismong benepisaryo man ro bukon it angay ag bagay sa pabaeay.
May iba nga ginapa-rentahan ukon ginabaligya ro baeay, tapos balik eon man sa dati, medyu gina-obrang negosyo ro bulig.
Rason nga dapat nga saea-on it mayad ro mga pagataw-an ag mabantayan ro anumang paeag it pagpang-abuso.
Indi naton pag-uyangan ro kahigayunann ag anumang bulig nga ginatau it gobyerno bangud nga ro kada sentimo sa mga programa ag proyekto hay halin sa boesa it kada sambilog katon, halin sa dugo ag hueas.
