KALIBO, Aklan — Daog ro legendary boxer nga si Manny Pacquiao sa anang legal rematch kontra sa Irish MMA star nga si Conor McGregor.
Suno kay Bombo International Correspondent Pinoy Gonzales it Texas, USA nga nauna eon nga ginmanduan si Pacquiao nga magbayad it masobra sa $5 million sa promoter ni McGregor nga Paradigm Sports bangud sa gina-alegar nga owa pagsunod sa kontrata para sa sangka high-profile fight.
Nag-ugat sigon ro kaso ko 2020 matapos nga nagpirma si Pacquiao it kontrata sa Paradigm Sports agud nga mag-organisa it boxing match kay McGregor kapareho it natabu nga bakbakan nanda ni Floyd Mayweather ko 2017.
Apang owa nadayun ro hampang matapos nga mapiyerde si McGregor ni Dustin Poirier sa andang rematch.
Angot kara, nagpasugot man si Pacquiao nga magpirma it kontrata sa Premier Boxing Champions agud nga suk-ean si Errol Spence Jr., nga nagtueod sa Paradigm nga kasuhan si Pacquiao.
Nagdemand sanda nga ibalik ro bayad nga $3.3 million nga ginbayad kana kaibahan ro dugang nga $1.8 million nga damages.
Sa unang pagpamati it California Superior Court , ginmanduan si Pacquiao nga magbayad it kabilugan nga $8 million kaibahan ro bayad sa pagpamati it korte.
Apang gin-apela ni Pacquiao ro desisyon it korte, kun sa siin ginbaliskad it hukom ro dating desisyon.
Gindeklata it hukom ro kontrata sa tunga ni Pacquiao ag ko promoter nga null and void ukon owa it bisa bangud sa kawad-an it nagakaigo nga boxer representation license it CEO it Paradigm halin sa California State Sports Commission kat ginpirmahan ro kasugtanan.
