KALIBO, Aklan—Engkaso nga magapadayun ro maka-alarma nga pagtaas it kaso it coronavirus disease (Covid-19), pagahinyuon ni Aklan Governor Florencio Miraflores sa national inter-agency task force nga ibutang ro probinsiya sa enhanced community quarantine (ECQ).
Mabahoe suno kana ro anang pagduda nga nakasueod eon ro delta variant bangud sa gulping pagtaas it kaso it sakit ag mga nagakamatay kada adlaw.
Sa makaron hay ginahueat pa sigon nanda ro resulta it ginpadaea nga specimens para sa genome sequencing.
Bukon man suno kana it maeayo nga makasueod ro delta variant bangud nga boundary it Aklan ro Pandan, Antique kun sa siin unang natumod ro mas makahaealit ag makamaeatay nga variant it COVID 19.
Ginpahayag dugang nga nagapabilin ro Aklan nga high risk area bangud sa mataas nga ADAR, ICU utilization ag positivity rates.
Sa makaron hay naga-abot sa average nga 150 hasta 200 ro kaso nga nailista kada adlaw sa Aklan umpisa ko buean it Mayo.
Mag-eowas kara, sa sueod eamang it tatlong buean ro death toll hay nag abot eon sa 184 halin sa 47.
Nauna eon nga ginmandu it gobernador sa mga alkalde it Aklan nga magpahaum it burial grounds para sa mga namatay nga COVID positive matapos nga temporaryong ginsuspinde ro operasyon it naga-isaeahanon nga crematorium sa siyudad it Iloilo.
