KALIBO, Aklan—Padayun ro operasyon it kapulisan agud nga matapna ro illegal nga bueang sa probinsiya it Aklan.
Suno kay P/Capt. Willian Aguirre, task force commander it anti-illegal gambling it Aklan Police Provincial Office nga maskin paskwa hay sunod-sunod ro andang ginkasa nga operasyon.
Unang ginsalakay nanda ro ilegal nag tupada sa Brgy. Buenafortuna sa banwa it Nabas, kun sa siin limang katawo ro gindakop ag narekober ro limang inugbueang nga manok ag 2,000 pesos nga ginapatihan nga taya.
Kasunod kara, 6 nga katawo man ro naaresto sa Oyo Torong St. Kalibo nga nadakpan man sa akto nga nagapatigayon it illegal nga bueang.
Kaibahan sa ginkumpiska sa lugar ro limang inugbueang nga manok nga puro patay eon ag kapin sa 5,960 pesos nga taya.
Ro mga nadakpan hay igapaidaeum sa inquest proceedings sa lunes sa kasong pag-eabag sa Illegal Cockfighting Law.
Ginpahayag dugang ni Capt. Aguirre nga ro tikang hay bilang pagsunod gihapon sa direktiba ni Pangueong Rodrigo Duterte nga ginabawae ro tanan nga klase it sugae kaibahan eon ro tupada sa tunga it naexperiensiyahan sa gihapon nga pandemic kun sa siin hugut nga ginapatuman ro physical distancing bangud nga dikara nagahalin ro madasig nga pagtaeapnan it makamaeatay nga sakit.
Samtang, ginpamalibaran ni Capt. Aguirre ro alegasyon nga may nagaprotekta sa mga nagapatigayon it tupada rason nga mabaskog ro andang buot nga maghimo it iligal.
Sa andang pag-imbestigar, ginasugid nga kaeabanan sa mga eakot sa tupada hay nagatrato ag nagakasugot nga magsugae gamit ro andang mga manok.
Angot kara, gin engganyo pa it opisyal ro mga pumueuyu nga padayun nga magpaabot kanda it impormasyon angot sa iligal nga bueang.
Nakikipag-angot sigon sanda sa natungdan nga Municipal Police Stations agud nga madinaeag-on nga masakote ro mga eakot sa nasambit nga aktibidad.
Padayun suno kana nga ginapatuman ro “one strike policy” rason nga todo alerto ro mga kapulisan sa bilog nga probinsiya.
