KALIBO, Aklan—Padayun ro paghimakas it Department of Education ukon DepEd Aklan agud nga eubus nga mapahauman ro nakataeana nga pagbukas it klase sa Agosto 24.
Hasta sa makaron hay padayun ro andang preparasyon sa pag-imprinta ag distribution it learning materials para sa modular learning program kamana man ro pagpangayo it bulig it mga manugturo ag eskwelahan sa andang komunidad sa idaeum it andang ‘Bond Paper Mo, Module Ko’ online campaign.
Angot kara, ginapasaeamatan ni Schools Division Superintendent Dr. Miguel Mac D. Aposin it DepEd-Aklan ro mga nag donate it bond paper nga nauna eon nga ginpanawagan sa andang Brigada Eskwela makaron nga dag-on.
Gindugang pa kara nga may pondo man ro andang central office, apang bukon it bastante.
Base sigon sa resulta it Learners’ Enrollment and Survey Form, nagapakita nga kaabuan sa mga ginikanan hay mas pabor sa modular distance learning kumpara sa iba pang pamaagi it pagtinueur-an.
Ro mga donors hay pwedeng mag donate it sangka ream ukon 500 sheets it A4-size bond paper para sa printing it andang modules.
Ginpasiguro man kara nga makikipag-angot sanda sa department of trade and industry ukon DTI agud nga masiguro nga indi makaangkonn it over pricing sa kada ream it bond paper nga naga-abot ro presyo sa 150 hasta sa 300 pesos.
Sa pihak nga parte, ginpaabot ni dr aposin nga umabot it haeos 99% ro enrollment makaron nga dag-on kumpara ko nagtaliwan nga dag-on.
