Nagatambak ro mga smuggled nga carrots, sibuyas, bawang ag iba pang tinuea sa mga tindahan sa Metro Manila ag kaiping nga mga probinsiya.
Nauna eon nga nagpatigayon it inspeksiyon ro Bureau of Customs sa Divisoria ag maabu ro nakumpiskang carrots.
Sa pihak kara, nagapabilin nga mahipos ro Department of Agriculture nga dapat hay sanda ro nagapanguna sa pagkumpiska.
Madali nga makilaea ro mga imported nga tinuea bangud nga mabahoe kumpara sa mga tinuea nga gina-ani sa Benguet.
Mas barato man ro mga raya kumpara sa mga local nga tinuea.
Ro mga imported nga carrots hay masyadong makutom ro kolor ag kaeabanan nga makit-an sa Divisoria.
Ro mga smuggled nga tinuea ro rason it kalbaryo it 130,000 vegetable farmers sa Benguet.
Tatlong hearing eon ro ginpatigayon it Senado angot sa vegetable smuggling apang owa sa gihapon it natabu.
Ko Martes, gintawag ni Albay Rep. Joey Salceda ro DA nga “mother of all smuggling” bangud nga pati mantika halin sa Malaysia hay ilegal nga nakasueod sa nasyon.
Ginpangaeanan it senado ro mga tawong sa likod it smuggling nga sanday Manuel Tan, Andrew Chang, Jun Diamante ag Leah Cruz alyas “Onion Queen”.
Suno kay Edsel Batalla it National Intelligence Coordinatin Agency (NICA), 20 smugglers ro una sa andang listahan ag gina-protektahan ro mga raya it limang mataas nga government officials.
Wakasan eon ro kalbaryo it mga lokal nga mangunguma it tinuea.
Kasuhan ro smugglers it tinuea ag andang protektor.
