Kalibo Aklan ————-Posibleng magapangatubang it kasong parricide ro sangka padre de pamilya matapos nga ginbuno-patay ro anang kaugalingon nga asawa kaina it agahon sa Ati Village, Barangay Bulwang Numancia.
Suno sa imbestigador it nasambitan nga kaso nga si Pssgt. Felizardo Navarra Jr. it Numancia PNP nga antes natabo ro insidente hay nag-inuman pa ro biktima nga si Lovely Suares, 37 anyos kaibahan ro suspek ag mismong asawa kara nga si Andres Suares Jr., 39 anyos ag parehong residente Barangay Angare, Dueñas, Iloilo apang presenteng naga-istar sa nasambitan nga lugar.
Samtang una sa katung-anan it pagkinasadya hay nagjoke sigon ro biktima sa anang asawa nga raya hay may kabit ukon ibang karelasyon.
Owa man sigon nagpalugi ro eaeaki ag nagbugae man nga may anang ibang babayi.
Apang, ko ulihi hay gulpi eamang nga nagbo-oe it siyaw ro suspek ag ginbuno sa puwak ro biktima.
Base sa resulta it post mortem examination it biktima, naabot ro anang ugat sa liog matapos makaangkon it grabe nga lastro it pagpamuno nga imaw ro naging rason it anang hinali nga kamatayon.
Nasayuran nga parehong miyembro it Ati community ro mag-asawa ag may unang limang ka mga unga.
Sa makarun hay nagapadayun pa ro imbestigasyon it mga otoridad sa nasambitan nga insidente.
Samtang sa pihak nga parte, ginpahayag man it suspek nga si Andres Suares Jr. nga ro grabeng selos it anang Misis ro naging rason it andang premi nga pagbais.
Antes man sigon ro insidente hay nagpabutyag ro anang asawa nga si Lovely nga makipagbueag eun lang bangud sa andang owa pagkailindintihan.
Bangud kara ginpaeag sigon it suspek ro anang asawa pamaagi sa pagtutok it siyaw apang aksidente nga nabun-an ro liog kara.
Gin-insister pa it suspek nga owa nana ginhungod ro hitabo.
Sa pihak kara, haom man sigon imaw nga batunon ro anuman nga kaso nga igapasaka kontra kana.
