KALIBO, Aklan—Patay ro sangka padre de pamilya matapos nga ginasugid nga nagbigti sa sueod it andang kwarto sa ikaywang panaegan it andang baeay kaina it aga-aga sa Brgy. Mantiguib, Makato.
Sa interview it Bombo Radyo, ginpahayag it magueang it biktima nga bandang alas 8 kaina it agahon matapos nga mataeupangdan nga owa pa nakaguwa it anang baeay ro anang manghod, ginsugo sigon imaw it anang ina nga usisaon ro kahimtangan kara.
Bangud nga naka-lock ro pwertahan hay nagsaka sigon imaw sa bungbungan pasueod sa baeay it anang igmanghud.
Sa paglingling sa bintana hay nakita nana ro biktima nga nagabitay eon sa daeana it baeay gamit ro kaeat.
Suno kana nga dali dali nana nga ginpaeos sa pagkabitay ro biktima apang maeamig eon raya.
Nakita man sa kwarto ro sangka suicide note kun sa siin ginhabilin nana ro dapat nga obrahon kana sa anang pagkamatay eabi eon ro eambong ag sapatos nga igasuksok.
Ro nasambit nga suicide note hay ginturn over sa Makato Police Station.
Samtang, ko Huwebes hay ginhatud sigon nana ro anang asawa ag sang dag-on nga unga sa baeay it anang ina sa banwa it malinao sa indi masayuran nga rason.
Bandang alas-5 kahapon it hapon ulihi nga nakita nga buhi ro biktima.
Blangko ro pamilya sa rason it anang pagbigti bangud nga owa man sigon raya it ginasugid nga problema.
Nasayuran nga ro biktima hay nagatrabaho sa sangka motorparts.
Sa pihak nga parte, nagapati ro pamilya nga owa it foul play sa insidente.
Suno sa anang panugangan nga owa man imaw it nataeupangdan nga problema it mag-asawa.
Ko Huwebes suno kana hay naghatud imaw it suman sa birthday it anang unga kun sa siin hay naki-agaw pa sigon raya sa anang unga.
