Uwa ginpaboran it Kabataan Partylist ro nagahueag makaron sa Kamara nga pag-amyenda sa economic provisions it 1987 Philippine Constitution.
Suno kay representative Raoul Abellar Manuel, dapat inde raya pagtutukan makaron it gobyerno bangud nga inde raya makabulig sa presenteng sitwasyon it nasyon kon sa siin nagapangatubang ro mga pumueoyo sa grabeng problema nga ginakaeakipan it pagtaas it baeak-eon, kakueangan sa supply it agrikultura ag maabong iba pa.
Ginpahayag dugang nga bukon it pabor sa publiko ro tuyo kara nga makaangkon it syento porsyento nga ownership sa eogta ro mga dumueoong kaparehas sa nakabaehag sa proposisyon nga tuyong makabueo it foreign direct investment nga magaresulta sa dugang nga trabaho para sa mga Pilipino.
Nasayuran nga ro panawagang Charter Change ukon Cha-cha hay para sa pagbag-o sigon it economic provisions it Konstitusyon.
Ko 2020, nagpangatlo ro Pilipinas bilang most restrictive country base sa Organization for Economic Cooperation and Development”s (OECD) foreign direct investment regulatory restrictiveness index (FDI Index).
Kaibahan sa restrictions ro 60-40 ownership, pagbawae sa foreigner nga magpanag-iya it mass media, ag ro ownership cap sa advertising agencies ag educational facilities.
