KALIBO, Aklan — Bangud nagagamit sa korupsyon kaparehas it “pastillas” operation, ginsuhestyon ni Bayan Muna Party-list Rep. Carlos Isagani Zarate nga tyempo eon agud amyendahan ro lumang Immigration Law.
Katuyuan sigon kara nga maisaayos ro immigration policy it nasyon kapin eon sa pag-isyu it permit sa mga dumueoong nga gustong magtrabaho sa nasyon kasunod it grabeng isyu sa illegal foreign workers sa Philippine offshore gaming operations (POGOs).
Bukon eon sigon raya it angay ag bagay sa ginapatuman nga laye kaparehas it labor taxation, turismo, border security ag iba pa.
Sa makaron sigon hay may mga nakadihon eon nga proposisyon kaangot kara.
Samtang, ginpahayag ni Cong. Zarate nga sa maabot nga Marso 11 hay uman nga pagatalakayon it Kongreso ro anang gindihon nga resolusyon nga naga-imbestiga sa POGO operations sa nasyon kaibahan ro mga eakot nga krimen.
Suno kana nga bangud sa operasyon it mga POGO hay nagsiguwaan eon ro problema it money laundering, loan sharking, illegal drugs, illegal immigration ag human trafficking.
