KALIBO, Aklan—Nagapabilin nga sambilog sa mga problema pag-abot sa ikaayong eawas sa nasyon hay ro pag-angkon it bitos ukon worm infection.
Suno kay Girlie Rubias, MedTech, Provincial Health Office ukon PHO-Aklan nga kinahangean gid nga magpaidaeum sa deworming ro mga inunga nga naga-edad 1 hasta 4 anyos ag 5 hasta 9 anyos.
Raya hay bangud sanda ro ginakabig nga vulnerable sa mga masakit nga pweding maangkon bangud sa mga bitos sa sueod it tiyan.
Pwedi man suno pa kana nga mamatay ro sangka indibidwal nga maabong bitos.
Nagiging mahina, maeuya, ag naduea-an it focus sa pagtuon.
Bangud kara, dapat sigon nga may tama nga sanitation ag malimpyo nga tubi sa sueod it panimaeay.
Dapat man nga mag-inom it sangka tableta nga libreng ginatao sa mga health center.
Importante man nga may kinaon ukon busog ro mga raya antes nga magtumar it bueong.
Samtang, kasunod kara, nagpanawagan man ro PHO-Aklan sa mga ginikanan nga owa pa nakapa-deworm sa andang mga unga nga magdangop eamang sa maeapit nga health center sa andang lugar.
