KALIBO, Aklan—Welcome development para sa Department of Education ukon DepEd Aklan ro anunsyo nga gin-aprubahan ni Pangueong Rodrigo Duterte ro proposisyon nga pagpatigayon it face to face learning sa mga lugar nga ginakabig nga low risk pag-abot sa Covid-19 infection.
Suno kay Schools Division Superintendent Dr. Miguel Mac Aposin it DepEd Aklan, engkaso gidman sigon nga ipatuman ro nasambit nga tikang hay magiging limitado ro numero it mga estudyante sa sangka classroom agud nga masunod gihapon ro physical distancing.
Sa kamatuoran suno kana ro plano it mga school heads hay may adlaw nga magasueod ro mga estudyante sa eskwelahan ag makipagkita sa andang mga manugturo ag ro iba hay ipaagi eon sa distance learning nga ginakaeakipan it modular learning; radio based instruction; tv based instructions; online learning; ag blended learning.
Apang, bangud sa naunang anunsyo it pangueong Duterte nga uwa it face to face learning nga matabo kon uwa it bakuna nga madiskubrehan hay nagpokus sigon ro DepEd sa pagpahaom sa blended distance learning.
Apang, haom sigon sanda engkaso nga maeakip ro Aklan sa pagataw-an it kahigayunan nga makaangkon it face to face learning.
Nasayuran nga ginrekomenda ni Education Sec. Leonor Briones kay Pangueong Duterte ro limitadong face-to-face classes sa mga lugar nga ginakabig nga “low risk” sa COVID-19 transmission nga insigida man nga gin-aprubahan ag ginsuportahan it presidente.
