NATIONAL News — Nagapanawagan ro National Press Club (NPC) of the Philippines sa mga awtoridad nga siguraduhon ro pagrespeto sa press freedom ag due process kasunod it pagkaaresto sa beteranong radio reporter it DZRH nga si Misael “Boy” Gonzales bangud sa gina alegar nga pageabag sa Data Privacy Act.
Suno sa NPC, dapat maging madahan ro mga natungdan sa pagbuyot it kaso bangud nga ro nasambit nga isyu hay may kaangtanan sa pagbalita it sangka mamamahayag angot sa sangka kasong may interes sa publiko.
Nag-ugat ro kaso kontra kay Gonzales matapos nana nga ibalita ro angot sa warrant of arrest nga ginpaguwa kontra sa sangka konsehal it Manila nga nagapangatubang sa reklamong lascivious conduct nga ginaeakutan sigon it sangka menor de edad.
Sa pahayag it NPC, ginpamilit kara nga ro naging report it radio reporter hay nakabase sa opisyal nga rekord it korte, rason nga klaru nga may basehan ro impormasyong ginpaguwa sa publiko.
Dugang pa it organisasyon, nauna eon nga ginbasura it korte ro reklamong ginpasaka kontra kay Gonzales sa idaeum it Cybercrime Prevention Act of 2012 bangud sa kakueangan it bastante nga ebidensya.
Para sa NPC, ro pagbasura sa unang reklamo hay pamatuod nga ro naging report it mamamahayag hay halin sa mga lehitimong dokumento it korte ag bukon it obra-obra eamang.
Madumduman nga ko nagtaliwan nga dag-on hay nagpaguwa it warrant of arrest kontra sa nasambit nga councilor angot sa gina alegar nga pageabag sa Section 5(b) it Republic Act 7610, nga gin-amyendahan it Republic Act 11648, kun sa siin may gintaeana nga piyansang ₱400,000.
Samtang, gin-aresto si Gonzales, 66-anyos, bandang alas-10:50 it agahon it Miyerkules sa atubang it Department of Justice sa Padre Faura, Ermita, sa ginpatigayon nga operasyon it mga tawuhan it District Police Intelligence and Operations Unit it Manila Police District.
