KALIBO, Aklan — Uman nga nagpatigayun it demolisyon ro mga otoridad sa mga istraktura nga padayun nga nakatukod partikular eon sa wetland area number 6 sa Brgy. Manocmanoc sa isla it Boracay.
Raya hay sa kasagsagan it naga padayun nga paglimpiyo ag rehabilitasyon sa isla nga nag umpisa ku Abril 26.
Sa interview it Bombo Radyo, gin pahayag ni Al Ronto it Community Environment and Natural Resources Office (CENRO)-Boracay nga kaabuan sa mga istrakturang nakatukod sa nasambitang lugar hay mga boarding house nga himo sa light materials.
Prayoridad makaron it demolition team ro mga boarding house nga owa eon it naga estar nga boarders.
Apang, owa pa sigon nanda gina hueag ro mga istraktura nga may mga occupants.
Base sa record it Department of Environment and Natural Resources (DENR) nga sa kabilogang 248 nga istraktura, masobra sa 20 kara ro legal claimants, kun siin sanda ro pagataw-an it relocation samtang ro mga transients hay gina pausoy it lugar nga maestaran.
Sa Barangay Cogon ag Dumlog sa mainland Malay ro nakita nga relocation area, apang, owa pa sigon it mga residente nga nagpaeapit sa LGU-Malay upang mag-avail it maestaran.
Gin pamilit pa it CENRO-Boracay nga owa nanda gina pwersang maghalin ro mga residente nga owa pa it masayluhan sa pihak nga gin isyuhan eon ro mga raya it notice to vacate.
