KALIBO, Aklan— Nagviral sa Aklan ro pag-eobong sa sangka alagang ayam nga ginhaya it kapin sa sang buean sa baeay it sangka dog lover sa may Oyo Torong St., Kalibo.
Ginpatigayon ro sangka funeral procession nga ginlibot sa bilog nga Kalibo Pastrana Park para sa ayam nga Japanese Spitz nga si Nikki.
Antes nga gin-eobong hay nakaangkon anay raya it public viewing sa ground floor it baeay it tag-iya it ayam nga si Albert Manalo.
Aminado si Manalo nga pauman-uman nana nga ginbutangan it formalin ro ayam agud nga mapreserba bangud sa inde sigon nana mabaton ro pagkamatay kara nga gin-alagaan nga parang onga.
Gin-atake sigon sa tagipusuon ro ayam nga naging kabangdanan it anang pagkamatay ko Disyembre 17, 2018.
Maabo ro nagbantay sa prosesyon ag nakisimpatiya sa pagkamatay it ayam antes gin-eobong maeapit sa bintana it kuwarto ni Manalo agud parang kaiping gihapon sigon nana raya sa pagtueog.
Mag-eowas sa ginpa-obrang kabaong, ginbutangan man it lapida ro eobnganan.
