KALIBO,Aklan–Makabig nga nagapabiling isolated case ro pag-eskapo it sangka inmate kapin sa sang dominggo eon ro nakataliwan ag nagapangatubang sa kasong may kaangtanan sa illegal nga droga ag robbery.
Raya ro ginpahayag ni Aklan board member Nemesio Neron angot sa pagpaeagyiw ni Randy Fulgencio, presenteng naga-istar sa Purok 3, C Laserna St. Kalibo, apang may address nga Brgy. Mambog, Banga.
Sa pihak kara, nagapati imaw nga owa it maskin sin-o nga maka-eskapo sa laye ag sa hugot nga ginapatigayong man-hunt operation it katapo it mga kapulisan.
Pagpasiguro man ni Neron sa publiko nga owa it dapat nga kabaeak-an bangud sa may positibo nga tikang ro provincial government angot sa nasambit nga kaso agud nga mapabilin ro kalinung ag seguridad it tanan nga mga pumueuyo.
Owa suno kana nagapabaya -baya ag ginatinguhaan gid it mga otoridad nga maibalik si Fulgencio sa kun siin raya nagakadapat.
Angot kara, naga-apela imaw nga taw-an it kahigayunan ag tiempo ro pamunuan it Aklan Rehabilitation Center ukon ARC nga maibalik sa andang pasilidad ro nasambit nga inmate.
Sa pihak nga parte, nagtanyag dugang si Neron it kapin sa P5000 pesos para mas mapadasig pa gid ro pagtugis kay Fulgencio