KALIBO, Aklan—Ginklaro ni Punong barangay Rolly Sucgang it Camaligan, Batan nga nag-agi sa tamang proseso ag may koordinasyon sa lokal nga gobyerno ro pag-eubong sa bangkay it sangka residente sa lugar nga nagpositibo sa COVID-19.
Ro pag-eubong sigon sa bangkay it natungdan nga COVID-19 positive hay sandig man sa protocols ag direktiba nga ginpagguwa ni Aklan Governor Florencio Miraflores.
Matueopangdan nga ginmanduan it gobernador ro 17 ka mga alkalde sa Aklan nga magpahaum it eubnganan bangud sa temporaryong pagpundo it operasyon it partner crematorium facility sa siyudad it Iloilo umpisa ko Agosto 2, bangud sa kaabo it mga ginadaea nga bangkay idto kada adlaw.
Bilang pagsunod sa protocol, kinahang-ean nga mai-eubong ro bangkay sa sueod it 12 oras matapos nga bawian it kabuhi.
Ro kutkot hay dapat nga may daeom nga 6 feet ag dapat nga nakabutang ro bangkay sa selyadong metal casket.
Pag-istorya ni kapitan Sucgang nga nasapwan eon lang nga owa it kabuhi sa sueod it sangka hotel sa banwa it Kalibo ro biktima ko gabi-i it Biyernes kun siin imaw presenteng naka-isolate.
Owa man nanda ginabuoe ro posibilidad nga nag-suicide ro biktima.
Una kara, nagpositibo sa rapid test ro nasambit nga biktima kasunod it anang pagpaidaeom sa dialysis.
Sa pihak nga parte, ginpaidaeom man sa lockdown ro sangka Sitio sa nasambit nga barangay agud nga makontrol ro pagkalhit it virus.
Suno kay Sucgang, nakalista sanda it waeong ka mga kumpirmadong kaso it sakit ag daywa ro namatay.
Ginpakamayad sigon nanda nga saraduhan ro daean nga sakop it lockdown agud nga mamonitor ro hueag it mga apektadong residente.
Kapin sa 68 ka mga household sigon ro ginpaidaeom makaron sa paghugut.
