KALIBO, Aklan — Nagapadayun ro imbestigasyon it kapulisan sa natabu nga pag hold-up sa sangka kolektor pasado alas-10 agahon it Lunes , Agosto 26 sa national highway nga sakop it Brgy. Rigador , Ibajay.
Sa imbestigasyon it Ibajay Municipal Police Station, samtang sakay it anang motorsiklo ro kolektor hay gin-abangan raya sa pakurbada nga karsada pinaagi sa pagbaeabag it sangka kahoy.
Matapos nga matumba hay gina alegar nga insigidang ginbo-oe it suspek ro sling bag it kolektor nga may sueod nga kapin sa P200,000.
Ginasugid nga ro biktima hay halin sa banwa it Kalibo ag paagto kunta sa Brgy. Caticlan sa banwa it Malay.
Samtang, ginpahayag ni Darry Manoy, residente sa lugar nga ko nasambit nga adlaw kaibahan ro anang misis halin sa ospital sa banwa it Kalibo ag nagapa-uli eon kunta kat maagyan nanda ro nakabaeabag nga kahoy sa daean.
Matsa batiis sigon raya it bahoe ag sang metro ro haba.
Apang owa sanda it nakita nga nakatumba nga motorsiklo.
Dugang pa nga maeaka ro mga saeakyan ko rato nga mga pang-orason bangud nga holiday.
Sambilog sigon imaw sa mga ginboe-an it impormasyon it kapulisan angot sa insidente.
Presente nga nagapatigayon it backtracking sa mga CCTV footage ro mga awtoridad maeapit sa nasambit nga lugar.
Sa pihak nga parte, ginpaabot ni Punong Barangay Felix Tumampil it Rigador, Ibajay sa publiko eabi eon ro mga naga-agi sa lugar nga maging alerto sa tanan nga oras.
Nagahueag eon man sigon ro Ibajay PNP sa pagresolba sa nasambit nga kaso.
