KALIBO, AKLAN — Hugot nga igapatuman it lokal nga gobyerno it Malay ro ordinansa nga nagabawae sa mga residente ag mga turista nga mag-inom it anumang makahi-ielong nga ilimnon sa mga karsada ag beachfront sa banwa it Malay ag isla it Boracay.
Suno kay Sangguniang Bayan member Nenette Graf, ro pagbawae sa pag-inom sa mga karsadahon, sports complex, mga plaza ag binit-baybayon hay sangka pamaagi agud mabawasan ro nagakatabong kinagamo ag mga ginapilak nga basura sa beach area kapin eon ro bote it ilimnon.
Ginklaro it opisyal nga bangud ro pag-inom it aeak hay kaparte it nightlife sa Boracay butang nga ginapasugtan ro pag-inom sa mga beachfront establishment.
Base sa ordinansa, ro sin-o mang madakpan nga naga-inom it anumang klase it aeak sa karsada hay insigidang pagadakpon it mga otoridad ag mahimo pang makulong ro mga raya mag-eowas pa sa multang igata-o.
Pasugtan eamang ro mga residente nga mag-inom sa kalye sa mga espesyal nga okasyon kaparehas it fiesta, special public events, festivals ag public celebration.
Pagataw-an man sigon it special permit ro mga barangay nga magpatigayon it andang aktibidad sa pampublikong lugar, basketball court, covered court kapin eon kon may reunions, kasae, birthday, lamay ag Christmas party.
Ginpahayag pa ni Graf nga ro pagpatuman sa nasambitang ordinansa hay para sa kapakanan it mga residente agud mai-eayo ro mga raya sa kinagamo kapin eon kon mahilong eon ro mga raya sa pag-inom it aeak.
