KALIBO, Aklan—Nagpagguwa it health warning ro sangka ahensiya sa South Korea para paandaman ro andang mga pumueoyo nga indi ihalo sa andang gina-inom nga soju ro kutapti.
Suno sa Ministry of Food and Drug Safety, puwedeng maging rason it kamatayon ukon makaangkon it grabe nga kondisyon ro sangka tawo nga naga-inom it soju nga ginbabaran it kutapti.
Naging trending ko kan-o eamang sa mga South Korean netizens ro kakaibang recipe it aeak ngara bangud nagapanaba sigon raya it blood pressure ag blood sugar.
Meuwas sa kutapti, naging trending recipe man ro pagbabad it alupihan ag eago sa soju.
Suno sa researcher it nasambitang ahensya nga si Kim Seung-hwan, mabuhay eon nga ginahimo sa mga liblib nga probinsiya ro pagbabad it mga insekto sa soju apang nag-abo ro naghana matapos mag-eapta ro recipe sa internet.
Mas pang nagakabaeaka ro mga awtoridad kat matueopangdan nga may sangka illegal nga tindahan sa Hwaseong city nga nagabaliga it mga soju nga may nakababad nga mga alupihan ag kutapti.
Padumdom it researcher nga si Kim Seung-hwan, owa pa it katibayan nga nakakabueong sa mga baeatian ro pinaghalong insekto ag soju ag mas posible nga allergic reaction ro mabuoe it mga tawong naga-inom kara nga magiging kabangdanan it kamatayon.
