KALIBO, Aklan – Temporaryong ginpapundo anay it lokal nga gobyerno it Malay ro pag-issue it Barangay Identification Card sa tatlong barangay it Balabag, Yapak ag ManocManoc sa isla it Boracay.
Sa impormasyong nabueo it Bombo Radyo Kalibo, ginsuhestyunan ni Mayor Ceciron Cawaling ro mga Punong Barangay nga punduhon anay ro pagta-o it Barangay ID bangud sa nagakagulo ro mga residente sa pagbueo kara.
Nasayuran nga ko nagtaliwang adlaw hay nagdagsa ro pilang residente ag mga trabahador para maka-proseso it nasambitang ID antes ro nakataeanang total closure it Boracay sa Abril 26.
Suno sa LGU Malay, ro temporaryong pagpapundo it issuance it Barangay ID hay tikang agud ayuson ro eksaktong proseso para kara.
Madumdumang nauna eon nga gin-anunsyo nga bawae makasueod ro mga turista sa tyempo it closure mag-eowas sa mga residente ag trabahador sa Boracay.
