KALIBO, Aklan—Mabahoe nga bagay ro naging pag-istorya via video call nanday US president Joe Biden ag Chinese president Xi Jingping nga nagbuhay it haeos daywang oras angot sa nagapadayun nga giyera sa tunga it Russia ag Ukraine.
Raya ro ginpahayag ni Bombo International Correspondent Greg Aguilar it California, USA.
Mabaskog sigon ro naging paandam ni Biden kay Xi sa posibleng implikasyon ag consequences partikular ro pagpatuman it penalidad engkaso nga magtau sanda it material support sa Russia sa tunga it nagapadayun nga brutal nga pag-atake sa mga siyudad it Ukraine kun sa siin maabu eon nga sibilyan ro namatay kaibahan ro mga unga.
Maabu suno kana ro maduea sa China kon papanaugan sanda it financial ag economic sanctions it US kaibahan ro mga kaalyadong nasyon nga Japan ag European Union nga naga-kontrola sa haeos 55 porsiyento it global economy.
Samtang, pabor man sigon si President Xi nga dapat eon nga matapos sa mas madali nga tiempo ro nagakatabu nga kinagamo sa tunga it daywang nasambit nga nasyon.
Maskin nga owa suno kana ginbasoe it China ro Russia partikular si President Vladimir Putin sa andang ginhimo nga pagsalakay apang nagpanawagan si Xi sa NATO nga makipag-dayalogo eon sa Moscow.
