KALIBO, Aklan—Nagpaguwa eon it pinal nga desisyon ro Local Government Unit (LGU-Malay) kaangot sa pagpapundo sa pagta-o it special permits para sa mga maeagkong events kon siin nakataeanang pagahimuon ro LaBoracay.
Base sa ginpaguwang advisory it LGU-Malay, “unanimously” ro andang desisyon nga punduhon eon ro pag-isyu it special permits sa mga organizers halin it Abril 27 hasta it Mayo 2 it presenteng dag-on.
Paathag it lokal nga gobyerno, raya hay para taw-an it daean ag suportahan ro ginahimong rehabilitasyon sa isla it Boracay kon siin ro mabahoe nga events sa Labor Day hay nagatuga it pagtaas sa numero it solid ag water waste.
Samtang, ro mga maisot nga organized events nga nagasunod sa Local Ordinances hay mahimo sigon nga taw-an engkasong legal ro andang mga dokumento ag gina-organisang events.
Nauna eon nga ginkumpirma ni Malay executive assistant to the mayor Rowen Aguirre nga nag-back-out eon ro mga corporate sponsors it nasambitang event bangud sa nakataeanang pagpasara sa isla it Boracay.
