KALIBO, Aklan—Suportado it Sangguniang Panlalawigan ro pag-oponer it lokal nga gobyerno it Malay sa Boracay Island Development Authority ukon BIDA bill.
Suno kay Board member Atty. Harry Sucgang nga nagpasa sanda it resolusyon nga nagakontra sa nasambit nga hagna bangud sa pagpati nga raya hay kabaliktaran sa nakabaehag sa konstitusyon ag pag-eabag sa Local Government Code.
Nagapanindugan suno kana ro LGU-Malay bangud nga engkaso nga maging laye ro nasambit nga hagna hay mabawasan kara ro share it andang Internal Revenue Allotment ukon IRA it limang porsiyento.
Raya sigon hay maagto sa Boracay Island Development Authority para sa gastos sa andang operasyon.
Bukon man sigon raya it pabor sa mga taga Malay ag Boracay bangud nga ro ginaduso nga authority hay pagataw-an it maabu nga gahum eakip ro paglunsar it mga proyekto kapareho it reclamation ag land classification.
Mag-eowas kara, maduea-an man sanda it poder sa pagkolekta it buwis ag iba pang mga baeayran.
Sanda man ro magapanguna ag maga-regulate sa pagtukod, operasyon ag maintenance it mga utilities ag iba pang imprastraktura sa isla.
Nagatuhaw sigon nga maitsapwera eon sanda sa pagdumaea sa Boracay nga ginakabig nga nagapangunang tourist destination bukon eamang sa nasyon kundi sa bilog nga kalibutan.
Sa pihak kara, nagapati si SP Sucgang nga nakaangkon gid man it pag-abusar ko una ro mga opisyal , mga negosyante ag mga residente sa Boracay rason nga napukaw ro atensyon it national government nga nagresulta sa pagmandu ni Pangueong Rodrigo Duterte nga ipasarado sa sueod it 6 nga buean para sa paglimpyo ag rehabilitasyon matapos raya bansagan nga cesspool.
Kon ro tuyo suno kana it BIDA hay agud nga maamligan ag mapabaskog ro industriya it turismo, kinahangean nga nagabueuligan kara ro Local ag National government.
