Kalibo Aklan——Nakadepende sa lokal nga gobyerno ro pagdesisyon kon iga-pull-out sa gintaeana nga ligtas COVID center ukon igapaidaeum eon sa strict home quarantine ro andang mga returning Overseas Filipino Workers (OFW) ag locally stranded individuals.
Suno kay Provincial Health Officer 1 Dr. Cornelio Cuatchon nga base sa bag-ong resolusyon it Inter-Agency Task Force nga may petsang Mayo 27, 2020 , sa pagdesisyon eon it LGU kon paalin nga iga-quarantine ro andang mga nag-uli nga OFWs ag LSIs.
Apang, ginklaru kara nga owa man it problema sa strict home quarantine basta nga raya hay ginasunod it tama.
Raya hay kasunod it pag-eabag sa quarantine protocol it sangka 28 anyos nga seafarer halin sa banwa it Lezo .
Maskin nga owa pa sigon natapos ro anang quarantine period hay nagguwa raya it andang baeay ag nagbisita sa anang mga kaigbataan .
Ginpamalibaran man nana ro mga espekulasyon nga nakipag-inuman pa raya sa andang mismong Barangay Kapitan base sa andang pag-usisa.
Miyerkules it agahon suno kana hay ginboe-an eon it swab specimen ro 10 nga katawo nga naka-ibahan it pasyente nga ginakabig nga mga high risk contacts.
Kadungan kara, ginboe-an man it repeat test ro seafarer nga insigidang gindaea sa Western Visayas Medical Center, ro sub-national laboratory sa Iloilo City ag makaron hay ginahueat ro andang laboratory test results.
Ro pasyente hay padayun nga naka-admit sa Aklan Provincial Hospital .
Ginkumpirma ni Dr. Cuatchon nga ro Aklan hay nakalista eon it 10 nga kumpirmadong kaso it COVID-19 nga may pitong eubusan nga nagmayad .
