KALIBO, Aklan — Ginapahaum eon makaron it Women and Children Protection Desk (WCPD) it Libacao Police Station sa pagpanguna ni Police Master Sargeant Anita Sauza ro nagakaigong kaso kontra sa daywang ka mga binatilyong ginasugid nga naghimueos sa 15 anyos nga dalagita sa banwa it Libacao.
Suno kay Police Captain Jose Marlon Murallo, hepe it Libacao PNP, base sa panaysayon it biktima, ko Setyembre 14 it alas-10:00 it gabi-e pa natabo ro insidente apang ko nagtaliwan nga Oktubre 9 eamang sanda nag-report sa taeatapan it pulisya matapos nga nakabati it istorya nga ginpabugae it mga suspek nga ginhimuslan nanda ro dalagita.
Ko una suno kana hay ginabalewala eamang kunta it biktima apang kat maabo eon ro nagkompronta kana kaangot sa insidente hay dikara eon imaw nakaangkon it kabaskog it it buot nga mag-report kaibahan ro anang ina.
Suno pa kay PCapt. Murallo, insigidang ginpaidaeom sa medical examination ro biktima agud nga madetermina kon nahimuslan gidman raya it ginatumod nga mga suspek ana man nga kakilaea ag kasimaryo mismo.
Ginpahayag dugang nga ginkumpirma it dalagita nga hilong imaw kat natabo ro insidente ag mismong ro mga suspek man ro anang mga nakainuman sa payag kon siin imaw sigon ginhimuslan.
Samtang, ginlaygayan ni PCapt. Murallo ro mga ginikanan nga inde pagpabay-an ro andang mga onga partikular ro mga naga-daeaga eon ag usisaon kon siin ro andang mga paeanawon agud nga may usuyon engkasong inde ro mga raya makauli sa gintaeana nga oras kanda.
