KALIBO, Aklan — Ginkontra ni Arlo Sabar it Philippine Institute of Volcanology and Seismology ukon Phivolcs-Aklan ro nagakalhit nga mensahe sa social media partikular sa Facebook nga may matabo nga kalamidad sa probinsya it Aklan kapareho it linog.
Suno kana, uwa it makadetermina nga eksperto kon san-o maabot ro kalamidad partikular ro gina-alegar nga pagtama it mabaskog nga linog sa Aklan nga ginatawag nga “Big One”.
Indi suno kana dapat patihan ro kaparehas kara nga mensahe bangud nga nagata-o eamang raya it koeba ag panic sa publiko.
Gin-engganyo man kara ro tanan nga ro Facebook page it Phivolcs ro andang buksan agud nga makabasa it nagakaigong impormasyon.
Aminado imaw nga sakop ro probinsya sa Panay fault line apang indi dapat raya paghimuon nga basehan agud nga tumama ro ginapakalhit nga “Big One”.
Mas mayad pa suno kana nga magpangamuyo ro tanan ag ponduhon eon ro pagpakalhit it mga mensahe nga makatuga it nerbyos sa tanan.
