KALIBO, Aklan — Eubus nga ginkalipay it pamilya Peralta sa naging desisyon it Civil Service Commission (CSC) Region 6 nga nagahambae nga illegal ro pag-terminate bilang general manager it Metro Kalibo Water District (MKWD) kay Atty. Edmund Peralta.
Madumduman nga ginpatalsik it MKWD board of directors bilang general manager si Atty. Peralta pagkatapos it sangka special board meeting ko Mayo 18, 2020 bangud sa “loss of trust and confidence.”
Ro termination hay nag-ugat sa daywang board resolutions nga pirmado it mga miyembro nga sanday Engr. George Rovero, board vice chairman Roselita Sauza, board secretary Jean Velarde, member Didi Quimpo ag board chairman Atty. Ariel Gepty.
Suno kay dating New Washington Mayor Atty. Shimonette Peralta-Francisco nga pinaagi sa nasambit nga desisyon hay naibalik ro dungog ag nalimpyuhan ro pangaean it anang nagtaliwan nga ama kun sa siin suno kana ro anang ginbatyag nga kaeain it buot ag kahuy-anan hay gindaea nana hasta sa anang kamatayon.
Raya hay sobra pa suno kana sa monetary reward nga andang posibleng pagabatunon .
Mapamatud-an sigon kara sa mga pumueuyu ag miyembro konsumidor it MKWD nga owa it basehan ro andang pagpatalsik kay Atty. Peralta.
Si Atty. Peralta hay naging general manager umpisa ko Enero 2018 ag napahalin sa pwesto ko May 18, 2020 nga insigida nga nagpasaka it reklamo sa CSC.
Samtang, nagapati ro kampo ni Atty. Peralta nga iga apela it MKWD ro nasambit nga desisyon eabi pa ag masyadong mabahoe nga kantidad ro andang pagabayaran sa pamilya.
Mag-eowas nga makabo-oe it backwages ag iba pang monetary benefits halin sa tiempo it anang illegal termination, pwede man nga makapungko bilang general manager sa MKWD ro sin-o man sa heirs ukon pamilya nga gin-aywan ni Atty. Peralta.
Nakabaehag pa sa desisyon nga ro pag-appoint kay Engr. Lydio Ureta bilang MKWD general manager hay inbalido kadungan ro pagmandu kay board chairman Atty. Ariel Gepty nga ibalik sa pwesto si Atty. Peralta.//
