KALIBO, AKLAN — Gina proponer ni Malay Sangguniang Bayan (SB) member Nenette Graf nga ibawae ro paggamit it videoke sa partikular nga oras sa isla it Boracay ag mainland Malay.
Raya hay agud maprotektahan sigon ro publiko kontra sa noise pollution.
Indi man sigon eubusang iga bawae ro pag-videoke kundi nga limitahan eamang ro oras.
Gin eksplikar ni Graf nga grabeng sangag ro gina daea it videoke eabi eon sa mga residential area dahilan nga maabong mga pumueoyo ro biktima it noise pollution.
Mag eowas nga nakaka-irita, dugang stress ro sangag maghalin sa videoke ag isturbo sa pagtueog ukon pagpahuway it mga tawo eabi eon sa dis-oras it gabie.
Sakop it anang proposisyon ro mga videoke bars nga masami sigon nga gina umpisahan it prostitusyon ag iba pang krimen.
