KALIBO, Aklan–Nagtaas it kapin sa P50 pesos ro terminal fee nga pagabayaran it mga turista nga magasueod sa isla it Boracay.
Suno kay dating Aklan board member ag makaron hay port administrator Esel Flores, maghalin sa dating P100 pesos hay magiging P150 pesos eon ro pagabayaran it mga bisita nga gustong magsueod sa isla.
Exempted sa nasambit nga baeayran ro mga residente it Aklan, bukon it residente apang may lahing Akeanon, nagapanag iya it valid terminal pass, ag mga unga nga may edad limang dag on panaba.
Dugang ni Flores, ko dag-on 2020 unang naaprubahan ro ordinansa sa sangguniang panlalawigan angot kara apang gin-veto ni dating Aklan governor Joeben Miraflores bangud sa pandemya.
Apang, uman raya nga gin-refile makaron nga dag-on kon siin nakabaehag sa General Ordinance No. 2022-021, series of 2022, nga ro terminal fee rate nga P150 pesos hay epektibo nga igapatuman umpisa makaron nga adlaw it Biyernes, Setyembre 23, 2022 para sa tanan nga mga turista nga may edad an-om nga dag on pasaka.
Natyempo eon man suno kana nga pataasan ro terminal fee bangud nga kapin sa napueong dag-on eon halin kat ulihi nga nagpataas it nasambit nga beayran agud nga amat-amat nga makabangon ro ekonomiya it probinsya pinaagi sa industriya it turismo.
