KALIBO, Aklan—Pagahimuon eon nga online ro pag-apply para sa student driver’s permit ukon driver’s license pinaagi sa online portal it Land Transportation Office ukon LTO.
Suno kay Engr. Marlon Velez, head it LTO-Aklan nga tuyo kara nga malikawan ro human intervention ukon padreno partikular sa pagbo-oe it eksaminasyon agud nga makapasar.
Ginduso sigon it gobyerno nga maging instrikto sa pag-isyu it driver’s license sa mga bag-ong aplikante agud nga maka-produce it mga responsabli ag quality drivers agud nga mapahagan-hagan kon indi man eubusan nga malikawan ro mga disgrasya sa daeanon.
Kinahangean suno kana nga ro kada driver hay makaangkon it nagakaigo nga training ag edukasyon.
Nasayuran nga matapos nga makabo-oe makaron it student permit, ro aplikante hay kinahangean nga magpaidaeum sa dugang nga waeong oras nga practical driving nga iga-supervise it LTO bilang pagpahaum sa pag-isyu it non-professional driver’s license.
Samtang, plano ni Engr. Velez sa anang pagpungko bilang operations head it LTO region 6 nga magtukod it drivers education center nga magapatigayon it libre nga seminars ag trainings bilang bulig eabi eon sa mga indigent ukon mga owa it ikasarang maggastos it mabahoe sa mga pribadong driving schools bilang requirements sa pagbo-oe it drivers license .
