KALIBO, Aklan—Pagasabton it Provincial Government ro pagapaidaeum sa real time reverse transcription polymerase chain reaction ukon RT-PCR test para sa mga naga-uli nga Locally Stranded Individual ukon LSI sa probinsiya it Aklan.
Raya ro ginkumpirma ni Ibajay mayor ag League of the Municipalities of the Philippines ukon LMP-Aklan chapter president Jo-en Miraflores sa interview it Bombo Radyo Kalibo.
Suno kana nga ro nasambit nga tikang it gobyerno probinsyal hay agud nga indi eun malisdan pa ro mga na-stranded nga Aklanon nga gustong mag-uli sa andang pamilya.
May kapin sa 20,000 test kits ro gintaeana it Department of Health ukon DOH-6 para sa probinsya it Aklan.
Ro kada LGU hay may una nga 10 slots nga pagaboe-an it swab test kada adlaw it Lunes, Miyerkules, ag Biyernes para sa mga lugar nga may mataas nga numero it naga-uli nga LSI samtang Martes ag Huwebes man para sa mga banwa nga may manubo nga numero it mga naga-uli nga LSI.
Tuyo man it scheduling nga ma-accomodate it maayos ro mga pagaboe-an it swab test.
Mismong sa RHU pagaboe-an it swab test ro mga LSI ag pagkatapos kara hay pagadaehon sa Molecular Laboratory it probinsya para idto hueaton ro resulta nga magabuhay eamang it daywa hasta tatlong adlaw.
Samtang sa pihak nga parte, ginpahayag dugang ni Miraflores nga samtang owa pa naga-abot ro resulta it test hay kinahangean nga magpaidaeum sa 14-days nga quarantine perios ro sangka LSI ag pagapasugtan eamang nga makauli engkasong mag-negatibo eun sa makamaeatay nga sakit.
Nasayuran nga ro mga requirements eamang makarun sa mga naga-uli nga LSI hay Medical Certificate, Travel Authority ag Letter of Acceptance magahalin sa andang Local government unit ukon LGU.
