KALIBO, Aklan — Nakakadismaya ro ginhimo nga pagbaeabag it Senado sa hana nga pag-aresto kay Senador Ronald ‘Bato’ dela Rosa ag makabig nga raya hay pag-eabag sa laye ag sa prinsipyo it saeabton.
Suno kay Atty. Michael Henry Yusingco, sangka constitutionalist ag law lecturer sa interview it Bombo Radyo Kalibo nga owa it gahum ro Senado ag maskin ro Kongreso nga baeabagan ro pagpatuman it sangka lehitimong warrant, eabi eon kon raya hay may basehan ag ginakilaea it gobyerno.
Ginpamilit pa kara nga indi pwedeng obrahon nga panaguan ro Senado agud nga paeagiwan ro saeabton sa mabug-at nga kaso.
Sa idaeum it laye suno kana, ro mga awtoridad hay ginaeauman nga ipatuman ro warrant of arrest, ag ro sin-o man nga magapamaeabag kara hay magapanabat sa proseso it hustisya.
Madumduman nga ginhana it mga ahente it National Bureau of Investigation nga ipatuman ro arrest warrant halin sa International Criminal Court angot sa kasong crimes against humanity nga may kaangtanan sa war on drugs.
Sa pihak kara, ginbaeabagan raya it security it Senado ag ginbutang sa “protective custody” ro senador sa sueod it building.
Nakaangkon pa it tensyon ag eukpanay it baril sa sueod it Senado samtang ginhana ro pag-aresto, nga nagresulta sa pagtakas ni dela Rosa.
Nagapadayun ro imbestigasyon sa insidente sa Senado, samtang nagapabilin nga ginadebatehan ro legalidad it ginhimo nga pagpugong sa pag-aresto ag ro posibleng saeabton it mga opisyal nga eakot.
