Ginpaathag it sangka ekonomista sa probinsiya it aklan nga nakabase ro pagbaeayluhan it piso ag dolyar sa supply ag demand it dollar sa merkado.
Ginpaathag ni Ramon Quimpo, sangka economics professor nga nagtaas ro presyo it langis kat magtuhaw ro giyera sa tunga it Ukraine ag Russia.
Mas maabung dolyar sigon ro kinahangean makaron agud nga makabakae it kinahangeanon eabi eon ro gina import nga langis rason nga naghina ro pagbaeayluhan it piso ag dolyar.
Apang sa pihak kara, mayad sigon raya nga balita sa mga overseas Filipino workers bangud nga mas mataas ro pagpabaylo nanda it andang kwarta.
Apektado man sigon sa mataas nga balor it dolyar ro gobyerno nga nagabayad it andang utang.
Mapuslan man suno kana ro pagnaba it piso kon magabaskog ro export it nasyon bangud nga mas barato nga mabakae it mga dumueuong ro mga produktong gina-export it Pilipinas.
Sa pihak nga parte, nagapati si Quimpo nga mas pang magasadsad ro piso kontra dolyar.
Apang dahan-dahan sigon ro anang paghina bangud sa pagbuhos it dollar remittances makaron nga ber-months rason nga makaangkon it bastanteng dollar reserves ro nasyon.
Tuga it mabaskog nga buying power it pamilya it mga OFWs, magataas ro demand sa goods and services rason nga magataas man ro presyo kara nga maka-apekto sa mga kubos ukon minimum wage earners .
