Pagbaeos ro sambilog sa mga posibleng motibo sa pagpamaril sa flag ceremony sa sangka barangay hall sa Barangay Salitran 3 sa Dasmariñas City, Cavite, agahon it Lunes, Mayo 27.
Base sa report, ro suspek hay ginasugid nga ginpahalin sa pwesto bilang barangay tanod bangud sa anang diabetes.
Sa imbestigasyon, ko buean it Pebrero hay nakabaton pa it sweldo ro suspek bangud nga nakakasueod pa imaw sa trabaho sa pihak it anang baeatian.
Apang makaron nga buean it Mayo hay gin-hold it treasurer ro anang sweldo kasunod it pagpahalin kana sa serbisyo tuga it anang pagiging ineffective eon.
Makita sa video footage ro mga empleyado it barangay nga nagatindog samtang ginapatigayon ro flag ceremony kat nagtikang ro gunman paagto sa mga tawo ag nag-umpisa nga magpamaril.
Ginasugid nga binaril it suspek ro kapitan it barangay ag sangka kagawad, kamana man nga gin-eagas ro sambilog pang kagawad nga nagdaeagan pasueod sa barangay hall ag ginbinaril man raya.
Kaibahan man sa ginbaril ro Sangguniang Kabataan secretary.
Namatay ro kapitan it barangay ag daywang kagawad, samtang ginabueong sa ospital ro SK secretary.
Matapos ro insidente hay nag-uli it baeay ro gunman ag ginbaril man ro anang kaugalingon.
Sa pihak kara, ginpabutyag it mga awtoridad nga posibleng target gid man it suspek ro barangay treasurer nga indi makita sa lugar kat matabu ro insidente.
Narekober it mga awtoridad ro daywang .45 caliber magazine.
