Nagpaandam si Senate Minority Leader Alan Peter Cayetano nga posibleng makaangkon it mistrial ukon maideklarang bukon it balido ro pagbista kon pagabag-uhon ro sueundanan sa numero it boto nga kinahangean para masentensiyahan si Vice President Sara Duterte samtang nagapadayun ro impeachment trial.
Sa umpisa it pagbista, gintaeana it impeachment court nga 16 nga boto ro kinahangean para sa conviction, base sa two-thirds it bilog nga 24 nga miyembro it Senado. Sa pihak kara, uman nga gintun-an ro threshold matapos owa makatambong sa pagbista ro pilang senador bangud sa magkaseparado nga legal nga isyu.
Tatlong retiradong punong mahistrado ag sangka retiradong associate justice ro gin-imbitahan it impeachment court agud nga magtau it panan-awan sa isyu. Suno sa tatlo sa ap-at nga dating mahistrado, indi kinahangean nga magpabilin sa 16 ro numero it boto, samtang may ibang legal nga panan-awan nga nagahambae dapat gamiton ro bilog nga membership it Senado sa pagsuma it two-thirds.
Para kay Cayetano, importante nga mapabilin ro mga sueundanan nga gintaeana sa umpisa it trial agud nga indi mabutang sa peligro ro gahum it mga naging proseso.
Sa idaeum it 1987 Constitution, kinahangean ro concurrence it two-thirds it tanan nga miyembro it Senado agud nga masentensiyahan ro sangka opisyal sa impeachment.
