Mabahoe nga tikang sa pagpabaskog it depensa it Pilipinas ro planong pagbakae it 20 F-16 fighter jets halin sa Amerika.
Suno kay National Security Council Assistant Director General Jonathan Malaya, gin-aprubahan eon it US Defense Cooperation Agency ro pagbaligya, alinsunod sa commitment it Trump administration kay Pangueong Marcos Jr.
Ginpatibay man it Amerika ro suporta kara sa defense treaty sa Pilipinas, kaibahan eon ro pagpadaea it advanced military capabilities para sa joint training it mga suldadong Pilipino ag Amerikano.
Ginasaligan nga magabaskog ro arsenal it AFP, eabi eon ag madugangan ro presenteng 12 FA-50 fighter jets halin sa South Korea.
Apang, hinambae man it Department of National Defense nga uwa pa sanda it nabaton nga opisyal nga abiso halin sa US.
Suno sa US State Department, nagakahaega it $5.6 billion ro nasambit nga pagbakae.
Ginklaro man ni Executive Secretary Lucas Bersamin nga ro tikang ngara hay para sa pagpabaskog it depensa ag uwa it ginatumod nga target nga nasyon.
