KALIBO, Aklan—Maga-umpisa eun makarun nga adlaw, Pebrero 1 ro programa it Provincial Health Office ukon PHO-Aklan para sa pagbakuna kontra sa mga sakit nga tigdas ukon measles, rubella ag polio.
Suno kay J-Lorenz Dionisio, Nurse III it PHO-Aklan nga ro nasambit nga programa hay kaparte it kampanya nga ginapatigayon it taeatapan agud nga mailikaw sa makamaeatay nga sakit ro mga pamatan-on.
Bangud kara, anang gina-engganyo ro publiko nga magkooperar ag magkonsulta sa andang barangay para makapartisipar.
Ginklaro man kara nga owa it dapat nga ikahadlok ro mga ginikanan kontra sa pagpabakuna.
Suno pa kana nga ro nasambit nga bakuna hay dati eun nga ginagamit ag ginabakuna sa mga inunga ag napamatud-an nga raya hay euwas.
Samtang, ginpasiguro man it taeatapan nga hugot nga igapatuman ro health protocol samtang nagapatigayon it immunization program.
Raya hay sa bulig man it bilog nga pwersa it Department of Interior and Local Government Unit (DILG) ,Philippine National Police (PNP), Bureau of Fire Protection (BFP), Municipal Health Office (MHO), Provincial Disaster Risk Reduction and Manangement Office (PDDRMO) ag MDRRMO engkasong may emerhensiya nga matabo.
