KALIBO, Aklan—Hin-aga eon nga adlaw it Miyerkules maga-arangkada ro pagbakuna sa mga tourism workers sa isla it Boracay matapos nga nag abot eon ro kapin sa 3,000 doses it COVID- 19 vaccine nga himo it Sinovac.
Suno kay Dr. Cornelio Cuatchon Jr. it Provincial Health Office ukon PHO-Aklan nga ro pag rolyo it bakuna hay kasunod it pag-umpisa it pagbakuna sa mga A4 priority groups ukon mga essential workers.
Madumduman nga mismong si Malay Mayor Frolibar Bautista ro nagbaton it mga bakuna halin sa Department of Tourism (DoT).
Tuyo it nasambit nga tikang nga maabot eon ro herd immunity sa banwa it Malay agud nga madeklarang eowas nga destinasyon ro Boracay.
Sa pihak nga parte, ro mga nabakunahan eon suno kana it unang dose sa bilog nga aklan hay kapin sa 7% ag ro fully vaccinated ukon nakabaton eon it double doses hay 2.8% pa eamang sa target nga eligible population nga makabaton it bakuna nga 399,000.
Apang ginpromisa sigon it national government nga sa 3rd hasta 4th quarater it dag-on hay magabuhos eon ro mga bakuna sa nasyon.
