KALIBO, Aklan — Prayoridad makaron it lokal nga gobyerno it Malay nga maumpisahan ro pagsaylu sa relocation sites it kapin sa 859 nga pamilyang naga estar sa wetlands agforest lands nga sangka protected area sa isla it Boracay.
Sa interview it Bombo Radyo, gin pahayag ni Rowen Aguirre, Executive Assistant on Boracay Affairs it LGU-Malay nga temporaryong paga estaran it pilang mga informal settler ro bag-ong construct nga daywang paeapag nga Malay Evacuation Center sa Brgy. Balusbos sa nasambitang banwa.
Naisapinal eon sigon ro pagtumod sa relocation site sa gin patigayung pueong nanday Malay Mayor Ceciron Cawaling ag Environment Secretary Roy Cimatu ku Mayo 25.
Sa final inventory it Department of Environment and Natural Resources (DENR), kapin sa 859 ro nailistang informal settler kun siin 341 ro nataw-an it notice to vacate.
Ro nasambitang mga residente hay naga estar sa 268 nga ektarya it wetlands sa Barangay Yapak, Manocmanoc ag Balabag ukon 27 porsiyento it kabilogan nga land area it isla.
Waeo sa siyam nga wetlands sa Boracay hay makit-an sa sueod it forestlands.
Gin pahayag pa ni Aguirre nga prayoridad it DENR nga mabawi ro wetland no. 6 sa Brgy. Manocmanoc nga gina estaran it 85 nga pamilya nga kaabuan hay naga pangupahan ag bukon it residente it Boracay.
