Maskin nga owa it paghueag sa presyo it baboy, nataeupangdan ro paghina it pagbaligya kara sa pilang baealigyaan matapos nga nakasueod eon sa probinsiya it Aklan ro African Swine Fever ukon ASF.
Suno kay Carol Arciaga, sangka meat vendor nga umpisa nga mag-eupok ro balita nga nakaangkon it kauna-unahan nga kaso it ASF sa Brgy. Arcanghel Sur, Balete, owa eon it masyadong nagabakae it baboy.
Nataeupangdan nanda nga haeos daywang adlaw eon nga owa nagaka-ubos ro andang baligya kumpara ko nagtaliwan nga mga inadlaw.
Nagapabilin sa 250 hasta 260 pesos ro kada kilo it baboy sa mga baealigyaan, apang may iba nga mas manaba pa bangud sa pagbarato it live weight.
Samtang, gulpi man nga bumagsak ro presyo it buhi nga baboy nga maghalin sa 170 pesos per kilo hay naging 140 pesos eon lang.
Maabu man nga mga backyard hog raisers ro nagpanic ag nagabaligya it andang alagang baboy sa barato nga presyo maskin sa social media nga gina-alegar nga naga abot sa 100 to 120 pesos.
Gindugang pa ni Arciaga nga maskin nga bargain eon ro presyo it live weight hay gina limitahan nanda sa daywang baboy eamang ro andang ginabakae.
Ro andang supply hay kaeabanan nga ginabakae iya sa banwa it Kalibo ag ginpasiguro nga raya hay safe ag eowas sa sakit.
Sa makaron ro LGU banga ag Altavas hay nagpaguwa man it executive order agud nga malikawan ro pagkalhit it makamaeatay nga sakit it baboy.
