KALIBO, Aklan—Mag-eowas sa Air Seoul nga uman nga nagbalik para sa andang pre-pandemic operation sa Kalibo International Airport ko Biyernes it tungang gabi-e, ginaeauman nga may ap-at nga iba pang airline companies ro magapatigayon it andang direct charter flights sa nasambit nga paeuparan.
Suno kay Engr. Eusebio Monserate, Jr. head it Civil Aviation Authority of the Philippines (CAAP)-Aklan nga makabig raya nga welcome development sa aviation industry ag pagbangon it ekonomiya it probinsiya it Aklan.
Sa Miyerkules, Hunyo 22, nakataeana nga maga-umpisa ro T’way Airlines sakay ro ginatantiyang 200 mga turistang Koreano nga magabakasyon sa Isla it Boracay.
Raya man sigon ro unang flight nanda pagkatapos it masobra sa daywang dag-on nga pagpanaeasa it covid 19 pandemic.
Sa buean it Hulyo hay tatlong iba pang airline companies ro magabalik operasyon sa paeuparan.
Puro nagahalin sigon ro mga raya sa Incheon, South Korea kun sa siin aprubado eon nanda ro slot ukon oras it arrival it mga raya.
Nasayuran nga ginsug-aeaw ro Air Seoul Airbus A330 it water cannon salute samtang ro mga turistang sakay kara hay gin-abi-abi it naka-abang nga Ati-Atihan tribe.
Sakay it eroplano ro 176 nga pasahero kaibahan ro sangka eapsag.
Raya ro unang international flight it paeuparan matapos ro masobra sa daywang dag-on.
Makaangkon it daywang flights sa sueod it sang domingo ro airline company, apang umpisa sa Hulyo uno hay nagpa-abiso nga magiging adlaw adlaw eon ro andang flight.
Sa pihak nga parte, preparado ro paeuparan sa uman nga pagbalik it mga international flights kabulig ro Bureau of Quarantine, Bureau of Immigration ag Bureau of Customs.
Mas maabu nga turista man suno kana ro sarang nga maakomodar it andang terminal building matapos ro renovation.
Ro Korea hay sambilog sa naeakip sa green list ukon mga nasyon nga ginapasugtan nga makasueod sa Pilipinas.
Ro mga turistang magabakasyon hay kinahangean nga nakapaidaeum sa RT-PCR test 48 oras antes ro andang departure sa point of origin.
