KALIBO, Aklan—Naging maayos ro ikaywang adlaw it implementasyon it limited face to face classes sa Banga Elementary School nga nag-umpisa ko Disyembre 6.
Suno kay Mrs. Herline Teodosio, Principal II it Banga Elementary School nga owa it anuman nga nailistang aberya sa uman nga pagbalik it in-person learning it mga estudyante.
Naga-abot sa 57 ka mga estudyante ro naeakip sa Set A ag Set B it eskwelahan nga kaibahan sa limited face to face classes kung siin daywa sa mga raya ro owa anay nakasueod matapos nga makaangkon it ubo.
Pagapasugtan eamang sigon sanda nga makasueod it eskwelahan sa oras nga magmayad eon sa baeatian.
Agud nga masiguro ro kaeuwasan it parehong manugturo ag estudyante, nagbutang sigon sanda it temperature scanners, alcohol dispensers, handwashing area, foot bath ag iba pa sa eskwelahan bilang kaparte it health protocols.
Samtang, may QR code man ro kada learners ag ginikanan kamana man nga may health declaration card.
Aminado si Teodosio nga matag-od eang ro andang naging preparasyon apang ginpasaeamatan man kara ro mga manugturo ag division head nga nagbulig kanda para ma-comply ro tanan nga kinahang-ean.
Sa kabilugan, may una eon nga tatlong ka mga pampublikong eskwelahan sa probinsya it Aklan nga ginpasugtan it Department of Education nga magpatigayun it limited face to face classes nga ginakaeakipan it Banga Elementary School, Malinao Schools for Philippine Craftsmen ag Laserna Intergrated School sa banwa it Nabas nga nauna eon nga nag-umpisa ko Nobyembre 15.
